|
|
|
 |  |
| Teny iditra | 1 Izy mirahavavy |
| Singan-teny | 2 izy, mirahavavy |
| Sokajin-teny | 3 anarana (lohatenin-tononkalo) |
| Voambolana |
4 Haisoratra: tononkalo |
| Mpanoratra |
5 Dox (Razakandraina Jean Verdi Salomon) |
| Tsanganana sy sary iray takila |
6 Fitanisan' ny tononkalo |
| Lahatsoratra |
7 ...
8 Efa akaiky ny ririnina. Mifarana ny fararano. 9 Manodoka ny eritreritra ny lanitra manganohano. 10 Ny vodilanitra malefaka ilentehan'ny masoandro 11 Mivolombolom-batolalaka, mangarangarana handrohandro... 12 Momba ravinkazo mihintsana ny tora-bovoka, ary izany 13 Dia manetsika alahelo sy vetsovetso lozan-tany! 14 Eo andavarangany eo Rahanta sy Rambolatiana, 15 Vonto izato takariva ka variana dia variana... 16 Harivam-pararano mantsy, mbola ahitana taratra, 17 Mampifoha ny lahataona, mampahatsiahy ny fahavaratra; 18 Nefa koa ahatsinjovana ny manga am-bodilanitra ory 19 Hiavian'ny ririnina tsy ho ela intsony akory... 20 Rahanta sy Rambolatiana indreo mangina fa variana! 21 Mitovy anefa ny eritreriny sy ny vetsony mangina 22 Mitopy itsy volon-danitra, mijery izato tokotany 23 Misimisy ahatsiarovany ny fahatanorany lany... 24 Ny volon'andro tahaka izao manetsiketsika ny fony 25 Hiaina am-panahy ny nofiny tafatsahatra famony... 26 Tsy nofy akory, diso aho, tena nisy anefa lahy 27 Tsy niainany ara-nofo, tam-panahy dia tam-panahy!. 28 29 Mpirahavavy kambana, hono, Rahanta sy Rambolatiana. 30 Hitanao mijery izany satria tapiny itoviana 31 Na ny bika na ny endrika na ny fihetsika madinika... 32 Hatramin'ny fitafy aza raha toa ianao mandinika 33 Dia hahita f'isan'andro dia tsy maintsy itoviany. 34 Angamba tapitra mitovy hatramin'izay zava-tiany! 35 Tsy zazavavy intsony izy amin'izao fotoana izao 36 Fa mandia ny fahalehibeazana... Ho gaga ihany anefa ianao 37 Raha mijery azy miaraka tsy misaraka hatraiza, 38 Toa mpirahavavy kely, saiky tsy omban-tsakaiza, 39 Eny an-tsena, am-pivoriana, eny an-dalana, ao an-trano 40 Izy samy izy ihany no miaraka, tazano... 41 Izay mandalo harivariva eo anilan-tranony eo 42 Dia hamelovelo handre " piano " arahim-peo. 43 Mikalokalo harivariva Rahanta sy Rambolatiana. 44 Kalon'olon-diso nofy manakoako fahoriana! 45 Zazavavy nanahoana tamin'ny fahatanorany 46 Ireo mpirahavavy ireo no dia tsontsa tahaka izany? 47 Raha ny bika sy ny endriny fehizany indray aloha 48 Dia azo vinanina marina fa dia fanaperan-tsoa! 49 Izao lehibe izao izy mbola ahitana izany. 50 Mbola mahavariana fatratra, andriandriana ny hatsarany. 51 'Njay izy maorimaorina, vaventy fa malefadefaka 52 Ka ny soroka mahitsy havanambanana fipetraka. 53 Mihodi-bola lasa fotsy, avoavo tendron'orona, 54 Ngalingaly maso izay... Mampidera ny Mpamorona 55 Hatramin'ireo volon-dohany mitofatofa olioly. 56 Rofia mijoro mavamavana, endriky ny tanimboly! 57 Ry zareo'ray tanàna raha toa ilana resaka 58 Dia hilaza f'izy ireo nisy naka vady betsaka, 59 Saingy asa fa nandà hatrany hatrany hatramin'izao... 60 Mba ahoana indrindra re? Eny, ahoana, hoy ianao? 61 Zanak'olo-mpanana, hono, Rahanta sy Rambolatiana. 62 Tsy zoky, tsy zandry... Izy ihany ka dia tapi-java-tiana. 63 Nataon'ny rainy sy ny reniny kindriandriana sy lalao. 64 Nampihantaina ka nomena izao tiany rehetra izao! , 65 Hatrizay fahakeliny tsy misaraka tokoa. 66 'Ray lalao'ray fitafy,'ray fandriana,'ray fo! 67 Raha kasihina ny iray dia ny iray no tomany. 68 Niombon-javatra nanjo ary niombon-java-mamy. 69 Voninkazo indray mamony, mitovy hanitra sy felana. 70 Nony fe-ho tovovavy, indro miara fanaperana. 71 Iray faharadondradona ary iray hatasitasy. 72 Miombona fisoritra endrika, indray somary kasikasy 73 Amin'ireto voamaso andriandriana fibaliaka 74 Ary ireo laingo-molotra tia tsiky sy hehy sariaka... 75 Ny fitoviana ara-po, ara-tsaina, ara-toetra 76 Moa tsy miharihary marina amin'izay ataony rehetra! 77 Ary hita ihany koa amin'ny fomba anehoany 78 Ny fitiany sy fitsarany izay rehetra anoloany 79 Fa moa va tsy mitovy hatramin'izay boky tiany? 80 Rehefa indray mamaky izy, aiza izany fifaliany! 81 .... 82 Amin'ny andraisantsika ny tantarany eto ity 83 Dia diaviny ny taona famontsinan'ny Fitia... 84 Taonam-betsovetso mamy... taona itiavam-bazo, 85 Itiavana masoandro, lanitra sy voninkazo... 86 Taona feno nofinofy ho an'ny fo vao hifoha 87 Iandrandrana hasambarana hampientana ny fo! 88 .... 89 Misy poety iray tiany, tiany, tena tiany indrindra 90 Tiany vetso, tiany vazo, tiany fo, tiany rindra. 91 Mila ho hainy tsianjery amin'ny poeziny rehetra... 92 Tsy mbola hitany tarehy nefa omeny toetoetra 93 Mifanaraka amin'ny vetsony. Aloalo tonga tiana! 94 Eo amolotr'izy roa ny anarana indrany hoe " Riana " ... 95 Poety vao miandoha fantatra... antenaina ho lasa marina! 96 Mba ianaran'izy roa ianaranarana takarina... 97 .... 98 Io harivariva io, Rahanta sy Rambolatiana 99 Indreo maka toera-mora ka variana dia variana 100 Mamaky ity gazety iray ao anatin'ny sale. 101 Toa ny poezin'ny Riana k'ifandrombahany, endrey! 102 Miara-mihetsika ny molony manonona ny teny mamy. 103 Indray mientana ny fony ka midoboka aok' izany. 104 Tsy tanany ho malemilemy ny feony teo am-pamakiana 105 Ary tsy hitany aza manko fa indro olona variana 106 Niato tamin'ny diany tampoka nandre izany feo izany... 107 Ka niampify ivohon'ny ravina hiery azy avy hatrany. 108 .... 109 Indro izao ny tononkalo indray vakin'izy roa, 110 Eny, indray hirainy mihitsy amim-pientanam-po: 111 " Ny diavolanao mba aiza no tiana holanina? 112 Eo an-tobin'ny zatovo mampiady hira va? 113 Sa an-tanim-boninkazo miaraka amin'olon-tiana? 114 Sa mangina samy irery eny an-tsisintsisin-tsaha " ? 115 Eo an-tenatenany eo... , taitra, ankona izy roa, 116 Injay misy feo reny, feo ahovitry ny fo 117 Nanohy ny poezy vakiny... Tsy hitany hoe " avy aiza " anefa. 118 Reny fotsiny amin'izao, mandrotsirotsy fiantefa: 119 " Mety hafana fo ianao ka hamonjy famoloana. 120 Hiara-mihira amin'ireo mitovy taona aminao... 121 Mety hangetaheta tiana ka handeha mifamotoana 122 Eny an-tanim-boninkazo amin'izay malalanao! 123 Mety hoentin'alahelo ka mamonjy moron-drano 124 Hanjono am-paravodirano volana manganohano... 125 Varian-tara-manga eo am-poto-kazomalahelo! 126 Ny diavolana zatovo dia diavolana korana. 127 Ny an'ny mpifankatia dia diavolam-pihantana... 128 Ny an'izay singan-drery dia diavolan'alahelo...". 129 Tapitra eo ny tonon-kira... Niato koa ilay feo mamy... 130 Vao mainka ankona izy roa! lo nipoitra avy hatrany 131 'Lay nanonona azy niery: tovolahy bikana fatratra! 132 Vao mainka hagagany loatra satria olona tsy fantratra! 133 .... 134 Zarazara izay izy, mazavazava fihodirana. 135 Olioly, avo handrina, mahiratriratra ka mirana... 136 Tsy nahahetsika izy roa... Efa niala satroka izy 137 Vao indreo taitaitra, dia nitsoriaka toa ankizy. 138 .... 139 Io alinalina io, eo Raherilantosoa 140 Mandany vetsovetso irery amin'ny diavolan-tsoa 141 Izay toa mandrotsirotsy ny zaridaina fararano 142 Amin-taratra, oriory, manga sy manganohano. 143 Lasa ery ny eritreriny amin'ny endriky ny Volana 144 Eo anelanelan-taho... Ny fitiany tsy mivolana 145 Moa tsy tahaka an'iny koa? Madio ka mangarangarana 146 Nefa mbola tsy voatsapany ho miteraka hasambarana. 147 Manana endrika sariaka, nefa indrisy mangatsiaka, 148 Fitia an'eritreritra ihany, oriory fibaliaka. 149 Ny fitiany tsy mivolana? Iza anefa moa no tiany 150 Amin'ireo domohina kambana? Ny endrika amam-pitsikiany 151 Tsy tapitra mitovy va ka tsy misy hafa akory?... 152 Toy ny volana mitaha amin'ny tarany an-kamory! 153 Ny fitiany tsy mivolana... Hivolana hanahoana anefa? 154 Voninkazo roa mitovy: ny fony aiza no hiantefa? 155 Samy mampientana azy ka tsy misy iray tsaroany 156 Ho mamabo azy mihoatra. Ts'isy azony fidina 157 Ka haborany amin'iza ity fitiavany mangina?. 158 .... 159 Lasa loatra ny eritreriny, lasa loatra ny vinaniny 160 'Nay iny volana iny hanatona azy ety an-taniny. 161 Zavavy soa mangatsohatso... 'Nay ho tokana hoatr'iny 162 Tsy hanahirana ny fony ny homeny ny fitiany!. 163 Kinanjo vetivety eo, nofy sa tena marina? 164 Moa nidina ny volana? Fotsy toy ny ampakarina 165 Indro manoloana azy " bika sy endrika malalany " ! 166 Jambena izy, eny, safotra... nihovitra ny fo adalany! 167 Dia indreo nifampitopy maso roa manganohano, 168 Mamirapiratra fitia, toy ny dobon-doharano... 169 Toy ny nofy: io Rahery fa nandray moramora 170 Ka namihina torovana'reo sandry roa bakora... 171 Dia nibanjina... nibanjina... Nanjenitra Razazavavy 172 Fararanom-pahanginana. Indro ts'isy teny avy. 173 Ny fanahy no miresaka... Inoana ny ifankahazoany ! 174 Tafandohalika Rahery fa navesatra ny fony!... 175 Be loatra ny hasambarany... Mamy koa raha mamy 176 Tsy mbola nisy tamin'ny fiainany fifaliana hoatra izany... 177 Moa ny volana no nidina hanambitamby azy ety? 178 Sa izy no nanidina fa nentanin'ny Fitia? 179 Tsy tsaroany n'aiza n'aiza no nisy azy tamin'izany. 180 Olombelona izy va sa afaka amin'ny tany? 181 Nangoraka izy dia nivaha ireo sandriny nangia... 182 Niaraka amin'izay nanidina ilay zavavin'ny Fitia! 183 Nielatra ny akanjo fotsiny mangatsohatso tara-bolana. 184 Badenina Razazalahy... . . ankona tsy nahavolana. 185 Indro izao Raherilanto amin'ny fo, fanahy sy sainy 186 Fa mibanjina'lay tokana izay niloka holalainy... 187 Tokana tsy mbola fantany amin'izy roa vavy, 188 Nefa hitany fa tia ka ninoany foana ho avy 189 Amin'ny toerana nihaonany iny omaly hariva iny... 190 Nohamasininy am-boady tokoa ny fitiany! 191 Koa satria noheveriny ho zava-dehibe izany 192 Dia notanany ny daty hotsarovany hatrany... 193 Daty iray amin'ny fiainany, mitari-dalana ny anjarany 194 Ary daty niposahan'ny masoandrom-pahasambarany. 195 .... 196 Naka saina koa izy ka nihevitra ny hatao: 197 " Aoka ho mendrika, hoy izy,'zay kasaiko hatramin' izao ". 198 Nifohafoha ny eritreriny dia injao tsaroany koa 199 F'isaky ny fandalovany, indray miseho izy roa ... 200 Sao dia miara-tia àry, hoy ny ahiahin-tsainy 201 Ka hitarika korontana amin'ity fitia lalainy... 202 Raha izany dia tsy tsara ny handalovany intsony. 203 Efa hita sady tapaka ny lalana homban'ny fony 204 Ka handiso fanantenana ny ankiray foana izany; 205 Dia nanapa-kevitra izy fa ny takariva ihany 206 Ao anatin'ny sale no iandrasany'lay tiany. 207 Moa va re dia tsy ho to araka ny faniriany? 208 Ny fihaonana omaly, dia tena maotina, madio 209 Tsy hanan-tahotra'lay tiany fa ho avy koa anio! 210 Moa va tsy iombonany izato hetaheta am-po 211 Sy faniriana am-panahy ka ny faniriany ho to? 212 .... 213 Tsy nandalo teo Rahery ny tontolo andro iny... 214 Rahanta koa dia tsy namboraka ny takarivan'ny fitiany 215 Ho fantatr'i Rambolatiana. Hokoboniny mangina 216 Hitohy tsy fantatr'iza izany na oviana na oviana. 217 Mitandrin-toetra fatratra izy tsy haneho ny toe-pony 218 Dia nivonona tokoa tsy hanindroa ny omaly intsony. 219 Namorona lahasa foana no nataony hanary dia 220 Ny fo, fanahiny sy sainy ianjadian'ny fitia... 221 Aviliny amin-java-maro ny eritreriny ho variana 222 Tsy hiangona hifantoka amin'ila' y tarehy tiany! 223 Mivavaka izy hampiala ny ahiahy anatiny ao, 224 Ho tongany aiza ka hatraiza izao kirim-pony izao? 225 Moa va handresy fa hery lehibe inoany 226 Hanohana azy hatrany hatrany ny voninahiny tandroany! 227 .... 228 Mbola nofinofy fotsiny, eny, am-betsovetso ihany 229 No anakaran'i Rambola izany hoe fitia izany. 230 Tsy mbola tsapany mivaingana fa manjavozavo ao, 231 Inoany anefa fa miteraka fiainana hafa, vaovao. 232 Tantara, hira, poezy maneho fitia no tsaroany 233 Mamohafoha ny fisainany sy fanahiny sy fony... 234 Andaniany eritreritra izay mba takatakany aminy! 235 Mahaliana azy ery ny hahatsapa ny hamaminy... 236 Fa mamy, hono, izy izany, loharanom-pifaliana 237 Ary foto-pahasambarana rehefa tojo fitahiana, 238 Ilain'ny fo sy fanahy toy ny rano velona aminy! 239 Fahazavan'ny eritreritra, voninkazony ka maminy! 240 Amin'ny toa izany izy no mitranga amin'ny fiainany 241 Ny endrika mirindra indrindra amin'ny vetso amam-pisainany. 242 Hatramin'izao ny tarehy nandalo azy rehetra rehetra 243 Tsy namohafoha azy fa nandalo tsy nitoetra... 244 Niseho Riana na Rahery araky ny fantatsika 245 Dia inay ilay nofinofy fa namelana baliaka 246 Ka nameno hazavana ny fanahiny sy fony: 247 Moa tsy voninkazo anaty ny fitiavana mamony! 248 Ihiran-dRambola ny fitiavany ny zava-boahary rehetra izao, 249 Ahitany fifaliana sy hazavana vaovao! 250 .... 251 Tsy nandalo teo androany Raherilanto, asa lahy! 252 Nangaihay ery Rambola, valabalaka am-panahy 253 Moa tsy zavatra nataony ho tena antom-pifaliana 254 Ny fahitana ny andalovan'ilay notiaviny mangina? 255 Diso izany izy androany ka tsaroany dia tsaroany 256 Ho banga taminy ny andro, nangentangentana ny fony... 257 Ka vao mainka koa ny embona mpahazo azy nihanahery, 258 Ny diavolana tsy andriny sao mba mahaverivery... 259 Alin-kely hatrany an-danitra mihamazava hatrany hatrany 260 Rambola irery no indro hitsinjo ny hiposahan'ny volana any. 261 Efa maizin-takariva. Tsy hitany fa ts'izy irery 262 No ao anatin'ny sale... Misy hafa koa miery 263 Ao anatin'ny lobolobon'ny garana midoroboka 264 Ary efa niandry teo amim-po midobodoboka. 265 Tsy iza io fa Rahery... (Nony reny nisy avy 266 Dia niafina izy aloha)... Niditra Razazavavy 267 Dia nitehina variana tamin'ny fefin'ny sale 268 Ary toa mametsovetso sy lasam-borona endrey!... 269 ..... 270 Tonga aloha Raherilanto fa tsy tahaka ny omaly 271 Satria nentanim-po maika, sady dodona no faly... 272 Dia nipoitra moramora ny volana; ary tamin'izany 273 Inao feo mihirahira manonona ny teny mamy. 274 Ankona Rambolatiana, tsy nahahetsika intsony, 275 Nientanentana indray ny fanahiny sy fony... 276 Hoy'ilay tonom-peo fantany mandrotsirotsy toa mozika 277 Miaraka amin'ny fisandratry ny volana baliaka; 278 279 " Nde hiaraka hijery ny volana hipoitra any 280 Amin'ny ora mahafeno alahelo ny éto an-tany; 281 Raha mitovy fo amiko ianao, ry zanak'olona, 282 Ndeha isika hiara-hitsinjo ny fiposaky ny volana! 283 284 " Mangamanga volon-tsetroka izao ny habakabatsika. 285 Raha toa mitovy volo tokoa ny nofinofintsika, 286 Dia hiaraka hianoka amin'ny taratra voalohany: 287 Zazavavy soa loatra ny volana amin'ny volon-dohany! 288 289 " Mba jereo ny farihy itarafany mangina. 290 Moa mientana ianao, ory sa am-pifaliana 291 Eo am-pijerena izany? Tiako ho fantatra tokoa! 292 293 " Izaho kosa dia mivetso endrika efa nolalaiko. 294 Volana ao anaty rano! Moa ny endrikao, ry Aiko, 295 Tsy mitaratra ao am-poko toy ny volana eroa " ? 296 .... 297 " Fa fitiavako ianao, fifaliako, fahasambarako, 298 Vahatr'aina, tanjon-tokana, eny tokana ifaharako... 299 Ametrahako ny androko, ny fo, fanahy sy fisainako, 300 Aminao no miantomboka ka mifarana ny fiainako! 301 302 " Fa fitiavako ianao, ... eritreritro, fanahiko; 303 Tsy hisaraka amiko, eny, n'aiza n'aiza tany hitsahiko, 304 Tompon'ny safidim-poko, manapaka ny momba ahy, 305 Anjely hiambina ahy hatrany raha izaho alaim-panahy: 306 307 " Fa fitiavako ianao, eny tena fitiavako, 308 Hira ao am-poko izany ka nasandratro eo am-bavako, 309 Hira mamiko indrindra, ô ka hirako hatrany! 310 311 " Fa fitiavako ianao, e fitiavako madio, 312 Hoy ny teny fivoadiana atolotro anao anio: 313 Ho fitiavako ianao, mandra-podiko ho tany...". 314 .... 315 Io tolakandro io Rahanta, raha teo an-jaridaina, 316 Namboamboatra voninkazo dia mba lasalasa saina 317 Asa asa fotsiny eo izay namohafoha ny fony, 318 Tsy nataony hotsahivina nefa indro lahy tsaroany 319 F'iray volana androtr'io iny diavolana iny! 320 Tafafoha indray ka nihovitra tao anaty ny fitiany! 321 Ataony ahoana!... Ataony ahoana ny vetsovetso miolomay? 322 Indro izy fa nisokitra amin'ny vodihazo iray 323 Ny daty vao tsaroany eo ary mbola hotsaroany... 324 Daty nampifoha azy tamin'ny torimasom-pony! 325 .... 326 Fararano fenomanana manganohano sady tony... 327 Rahery, Rambola indreo mampianoka ny fony 328 Eo am-bodihazo iray... Efa misy azy ery! 329 Sambatra tokoa manko, safononoka fitia!... 330 ... 331 Io no tiany fidoroboka amin'ny hazo rehetra eo. 332 ( Teo koa Rahanta irery no variana anikeheo...) 333 Finaritra Rambolatiana maneho fitia tsy hita intsony 334 Tomaratra amin'ny endriny ny hasambarana ao am-pony; 335 Mijery azy ampamiratin'ny fanahim-pifaliana 336 Raherilanto ka finaritra sy sond.riana dia sondriana. 337 Niomanany mialoha ny handronjina am-panahy 338 Sy am-po'ty olon-tiany hifohafoha ka hahatsiahy 339 Ny datin'andro izay nihaonany voalohany hoatr'izao... 340 Androtr'io, hono, izany vao'ray vola-mitatao... 341 Daty efa nohamasininy fa niorenan'ny fitiany, 342 Tiany hajoro ho tadidy dieny fe-ankehitriny. 343 Nataony ity Rambolatiana hahatsiaro, kanjo... asa, 344 Sondriana dia sondriana angaha ka tsy miherika ny lasa... 345 Indro izy fenofeno hampahatsiahy'ty olon-tiana: 346 " Mba tsy hohadinoinao na oviana na oviana 347 Dia sokiriko eto anio sy ao anatin'ny fonao 348 Ny datin'andro nanorenako ny fitiavako aminao... ". 349 Ndeha hisikotra azy manko nefa ankona nahita 350 Fa ny zavatra nokasainy indro zavatra efa vita... 351 Nofihininy Rambola ka tsy gagagaga moa! 352 Nientana izy: " Hay, hoy izy, efa vitanao mialoha " ? 353 Vao mainka gaga koa Rambola noho izy tsy nanao 354 Io sikotra eo io, sady izay tsy mitatao 355 Ho'ray volana tanteraka raha tsy ny ampitso koa 356 Ny nihaonana voalohany nanolorana ny fo... 357 Ary ho porofo aza fa tsaroany tsisy very 358 'Reo teny tamin'izay dia voaveriny tsianjery... 359 Teo dia safotra Rahery nahatakatra avy hatrany. 360 Fanina izy... nihodina aminy ny habakabaka aman-tany 361 Miharihary izao ny marina ka mivaingana ao an-dohany: 362 Tsy Rambola hay akory'lay nihaonany voalohany 363 Ka nataony hanorenana ny fitiavany tokoa 364 Araka ny voady masina nianianany tam-po! 365 Indro velona an-tsainy ny lalan'ny fitia nodiaviny: 366 Rahanta no namoha ny fony ka Rambola ity no tiaviny, 367 Fa tiany izao Rambolatiana, tiany koa raha tiany, 368 Zary anton'ny fiainany ary hany fifaliany... 369 .... 370 Fitiavana efa tsy tanteraka nefa andraindrain-doria? 371 Asa izay filaza izany: hadalana? sanatria! 372 'zaho kosa dia milaza fa fitia tsaroana indrindra 373 ny fitiavana tsy to, tsy mba afaka nirindra... 374 375 Eo an-davarangany eo Rahanta sy Rambolatiana, 376 Vonto izato takariva ka variana dia variana. 377 Harivarivam-pararano manko mbola ahitana taratra 378 Mampifoha ny lohataona, mampahatsiahy ny fahavaratra 379 Nefa koa ahatsinjovana ny manga am-bodilanitra ory 380 Hiavian'ny ririnina tsy ho ela intsony akory. 381 Rahanta sy Rambolatiana indreo mangina fa variana... 382 Mitovy anefa ny eritreriny sy ny vetsony mangina 383 Mitopy itsy volon-danitra, mijery izato tokotan 384 Misimisy ahatsiarovany ny fahatanorany lany... 385 Ny volon'andro tahaka izao manetsiketsika ny fony 386 Hiaina am-panahy ny nofiny, tafatsahatra famony... 387 Tsy nofy akory, diso aho, tena nisy nefa lahy... 388 Tsy niainany ara-nofo, tam-panahy dia tam-panahy. 389 390 Izay mandalo harivariva eo anilan-tranony eo 391 Dia mamelovelo handre " piano " arahim-peo 392 Mikalokalo harivariva Rahanta sy Rambolatiana, 393 Kalon'olon-diso nofy manakoako fahoriana! 394 Zazavavy nanahoana tamin'ny fahatanorany 395 Ireo mpirahavavy ireo no dia tsontsa tahaka izany?... |
| Nohavaozina tamin' ny 2023/10/21 |
|